Menu

El diputáu y coordinador de la formación, Ovidio Zapico, asegura que frente a los "caradures" que se “cuelen" son imprescindibles garantíes de cumplimientu de los protocolos médicu-epidemiolóxicos que se marquen

IX pidió güei máxima tresparencia nes vacunaciones n'Asturies pa evitar cualquier opacidá sobro los protocolos y prioridaes pa l'alministración de los fármacos d'inmunización y reclamó que s'espliquen les razones poles que se dio en inmunizar a cargos directivos de la Conseyería de Salú. El diputáu y coordinador xeneral de la formación, Ovidio Zapico, esixó al Gobiernu d'Asturies qu'ufierte tolos datos sobro'l procesu, estenando cualquier dulda. “Hai elementos escuros nel ámbitu européu; como vemos que nun hai compromisu per parte de les multinacionales farmacéutiques por satisfaer la demanda que tienen alcordada colos nuesos Gobiernos; como tamos viendo qu'en munchos puntos del Estáu español hai auténticos caradures y manguanes que se, lliteralmente, cuelen nel procesu de la vacunación y nun s'atiende a nengún tipu de criteriu, nin de protocolu establecíu, nun queremos que n'Asturies pase nada d'eso: que nun haya nenguna solombra, que nun haya nenguna zona escura en tou esi procesu de vacunación”.

Pa Ovidio Zapico ye imprescindible garantizar tol procesu respetando los criterios médicu-epidemiolóxicos de prioridaes. Por esta razón, cola fin de llograr que tol procesu de vacunación sía “nítidu, tresparente y afechu a esos protocolos” IX rexistró una serie d'iniciatives parlamentaries empobinaes, precisamente, a evitar cualquier esviación.