Menu

Ovidio zapico defende fuxir de posiciones radicalizaes pa garantizar un desenvolvimientu sostenible que respete la biodiversidá ensin escluyir la ganadería tradicional

Tolos grupos de la Xunta Xeneral del Principáu, salvu Podemos, aprobaron güei una proposición non de llei pa refugar la inclusión del llobu nel Llistáu d'Especies Monteses de Réxime de Protección Especial, al entender que se fraya cualquier lóxica na xestión d'una especie con una distribución xeográfica irregular y desemeyada, llantando iguales midíes nes comunidaes del Noroeste, les de mayor presencia d'esti cánidu, que naquelles otres nes que nun esiste siquier la especie. El diputáu d’IX Ovidio Zapico reivindicó la necesidá d'una xestión del mediu rural que compatibilice la vida natural y la diversidá pero ensin midíes que supongan la espulsión de la población.

Pal diputáu nun puede entendese falar de desenvolvimientu sostenible ensin garantizar les necesidaes del presente ensin comprometer les del futuru, calteniendo un equilibriu ente la economía, el bienestar social y el cuidu del mediu ambiente y la biodiversidá.

Zapico pidió fuxir de posiciones “radicalizaes” y de "demagoxes" que solo sirven pa la polarización ensin apurrir respuesta a les necesidaes reales del campu. "Ye responsabilidá de toos nós evitar convertir los conceutos rural y urbano nuna idea antagónico y engarrao. Ésa debe de ser la nuesa primer responsabilidá como representantes lexítimos de la ciudadanía asturiana; evitar y nun afalar rotures y enfrentamientos nel senu de la nuesa sociedá".

El coordinador xeneral d'IX esplicó que l'equilibriu nun puede consiguise con midíes arbitraries nin con posiciones "maximalistes", n'alusión a la ministra Teresa Ribera y al secretariu de estado Hugo Morán, "Debemos de refugar la so decisión d'incluyir al llobu nesti llistáu, respondida por amás nuna votación, cuandoquier estraña, de Comunidaes Autónomes que de la xestión del llobu saben más bien poco porque nun tienen nel so territoriu la responsabilidá de tener alderiques como'l que güei tamos equí calteniendo".

Ovidio Zapico aportunó na necesidá d'un equilibriu que solo ye posible si atender a la biodiversidá "en tola so estensión y nel que tien d'incluyise, ensin dulda, el llobu, pero tamién los seres humanos y los sos animales domésticos. Amás, añedió, "la presencia humana ye la que garantiza los términos económicu y social d'esta difícil ecuación que debemos de resolver".

IX, recordó, lleva defendiendo la mesma posición dende hai enforma tiempu, apostando pol equilibriu ente la presencia del llobu y l'actividá agroganadera. "Esti equilibriu encarnar nel Plan de Xestión del Llobu, insuficiente, coles sos faltes nos sos programes d'actuación añales, pero imprescindible p'atender a criterios de población razonables y a pautes de xestión alloñaes d'una declaración del llobu como especie cinexética, daqué que dende IX siempres refuguemos".

Dende 2002, gracies al Plan de Xestión, hubo un "fráxil equilibriu", según les palabres de Zapico, qu'agora queda invalidáu pola inclusión del llobu nesi llistáu. "Ye, poro, esixir la inmediata reversión d'esta decisión qu'abre la puerta a un escenariu bien difícil y con previsibles consecuencies bien negatives nel mediu rural d'Asturies, d'esa Asturies que precisamente sufre les consecuencia de les despoblación y que bien podríamos llamar l'Asturies balerada".

Zapico, nel zarru de la so intervención dirixíase de forma espresa a Podemos, "esi grupu parlamentariu col que munches vegaes compartimos trincheres" y que, nesti casu, asítiase enfrente: "dígo-yos con sinceridá que alloñase d'esta proposición non de llei ye arrenunciar a contribuyir na busca d'una posición consensuao y razonable; ye arrenunciar a ser un actor políticu relevante nel mediu rural y, lo que ye peor, señoríes, ye arrenunciar a ser, dende'l ambientalismo, un dique de contención frente a otres polítiques que, si nós estremamos, nun tengan dulda, que van surdir".