Menu

Ángela Vallina denuncia qu'un 35% de los contratos son d'interinos y que más del 10% son contratos a media xornada

Izquierda Xunida criticó güei los “esmolecedores niveles d'interinidá” n'Asturies, al ser bien penriba de los d'otres comunidaes y alministraciones públiques. Esa situación, según aseguró esta mañana la vocera de la formación, Ángela Vallina, ye, nel ámbitu educativu un “escándalu” que xustifica, dafechu, les movilizaciones convocaes polos sindicatos nes últimes selmanes.

Vallina recordó que de los 13.000 docentes qu'empresten los sos servicios na enseñanza pública, 4.500 sonlo de manera temporal, lo que supón que la tasa d'interinidá algama yá'l 35 per cientu. Por si fora poco, na precarización xuega tamién la contratación de más de 1.400 profesores a media xornada, de tala forma que eses modalidaes más precaries del ámbitu educativu amontáronse na última década un 300 per cientu: “un escándalu con toles lletres”, denunció la diputada.

Nel discutiniu de la Proposición non de Llei de Podemos pa l'apertura d'una nueva negociación colos axentes sociales del sector educativu pa buscar un alcuerdu nel ámbitu llaboral educativu, Vallina amosose partidaria de terminar con una situación “inaceptable”. La propuesta, sicasí nun llogró'l sofitu de la Cámara.

IX ye escéptica sobre una posible solución a esta situación, por culpa de que la Conseyería d'Educación nun ufierta “demasiao enfotu” na capacidá del so titular pa encetar nengunu de los problemes de la educación n'Asturies.

Sía que non, Vallina encamentó a abrir de forma urxente ya inmediata la negociación que, sía que non, tien d'empezar primero qu'empiecen les pruebes selectives.