Menu

Ovidio Zapico llama a la izquierda a analizar la nueva realidá d'Asturies, y pon a Xixón como exemplu d'un nuevu modelu políticu

Izquierda Xunida pidió güei un pactu de Navidá que suponga un xiru claro y decidío a la izquierda, dende este mesmu momentu, na política asturiana. El diputáu y coordinador xeneral de la formación, Ovidio Zapico, aprovechó esta mañana la so vez nel alderique sobro'l presupuestu autonómicu pa 2022 pa reclamar esi golpe de timón que debe y puede afigurase, si hai voluntá política, na selmana que queda antes del fin de 2021. "Lo primeru que debemos faer ye analizar la nueva realidá política que tenemos na nuesa Comunidá Autónoma: Xixón".

Pal dirixente, Xixón ye l'exemplu d'esi nuevu escenariu que foi posible, enfatizó, "como Izquierda Xunida de muñidora del alcuerdu de la izquierda y, poro, quixera empezar la mio intervención emplazando al restu de diputaos y diputaes de los grupos de la izquierda a buscar un alcuerdu políticu en redol a los presupuestos. Tamos, señoríes, entá tamos a tiempu d'algamar un alcuerdu políticu sobro los presupuestos".

L'oxetivu del viraxe a la izquierda sería, de primeres, escardar de los presupuestos elementos de l'axenda conservadora, como'l cheque ñácaru, los descuentos fiscales y dellos otros elementos apautaos ente'l Gobiernu y les dereches de Foro y Ciudadanos. Ello ye que son precisamente esos elementos regresivos los que fixeron que la formación dea un "sí distante" a unes cuentes que con un mayor pesu de la izquierda podríen ser más sociales y progresistes. Nesti sí tamién influyó, señaló'l coordinador xeneral d'IX, la posición de "los nuesos referentes sociu-políticos, que nun son otros que los sindicatos de clase: les Comisiones Obreres y la UXT". Sía que non, eses meyores nel presupuestu entá son posibles: "queden díes abondos pa poder taponar esos furacos polos que se colen estes polítiques conservadores".

Frente al “xiru calculáu” del Gobiernu d'Asturies prescindiendo de l'alianza suscrita con IX al entamu de la llexislatura, esplica, según Zapico, el distanciamientu que ye especialmente claro en materia industrial, pero tamién en política territorial, estatutaria o en materia d'Alministración. Ello ye que reprochó, "hai un terrible desinterés (per parte del equipu d'Adrián Barbón) d'algamar una axenda lexislativa como esti grupu parlamentaria".

Amás, Ovidio Zapico llamó al grupu socialista y al Executivu d'Adrián Barbón a sofitase na izquierda pa la reforma estatutaria, asumiendo la so responsabilidá de lideralgu pa empecipiar, de forma inmediata, la tramitación que dexe llograr la oficialidá del asturianu esta llexislatura. Nesti segundu oxetivu de cambéu, a la izquierda, el parllamentariu aportunó en que ye imprescindible recuperar el tiempu perdíu, pa lo que reclamó habilitar como mes útil xineru. "La izquierda tamién nel so conxuntu tien marxe de díes abondo, hasta'l 31 d'avientu, p'apautar un calendariu que nos faiga posible habilitar xineru; que nos faiga posible evitar una reforma estatutaria fallida. Y, equí, esixo lideralgu al Gobiernu d'Asturies".

Pa llograr l'oxetivu, convidó Zapico al Gobiernu y al grupu socialista, "miren pa la so izquierda en materia estatutario y que tola izquierda nel so conxuntu mire pal presupuestu. Esa sería la propuesta d'esti grupu parlamentariu: miren ustedes pa la reforma del Estatutu, miremos toos, queda tiempu, y sigamos un pocu la vía que se sigue en Xixón tocantes a lo que ye l'aprobación de los presupuestos".