Menu

Izquierda Xunida sollertó güei del riesgu de perder la primer añalidá de los fondos de transición, herederos de los fondos mineros, si nun se llogra presentar en plazuu’l plan territorial de transición xusta y el programa operativu que defina les prioridaes y les exes d'inversión.

Los plazos son afechos y, pa llegar a tiempu, la información tendría que tar unviada a Bruxeles. Nestos momentos, reprochó la vocera parlamentaria, Ángela Vallina, les acciones de la Conseyería d'Industria son desconocíes: "¿qué ta pasando colos fondos de transición xusta, esa llínea de financiamientu herederu de los Fondos Mineros? Tamos casi a mediaos d'añu y equí inda nun sabemos nada sobre a qué pretende destinar esti Gobiernu los 375 millones d'euros d'inversión que supon el Fondu de Transición Xusta p'Asturies".

La esmolición de la formación nun ye baladí. Asina, esplicó Vallina mientres les entrugues al Presidente, si nun se llega a tiempu, podríen perdese unos 30 millones d'euros, aprosimao, correspondientes a la primer añalidá. "Pola mio esperiencia –alvirtió–, dígo-y que si a estes altures del añu'l borrador del programa nun ta fechu, van perder ustedes la primer añalidá. Asina que una de dos, o lo tienen fechu pero equí nun sabemos nada, y ye grave polo que supon d'opacidá, o nun lo tienen fechu, lo que ye entá más grave, y vamos perder dineru: muncho dineru".

Ángela Vallina recordó los esbarafustes de la xestión de los antiguos Fondos Mineros y pidió que s'eviten los mesmos erros. El problema, llamentó, ye que'l Gobiernu decidió que lleven los Fondos de Transición xusta los mesmos qu'antes teníen la responsabilidá Fondos Mineros, lo que puede suponer qu'Asturies pierda la so última oportunidá. "Escoyó al Conseyeru equivocáu pa faese cargu d'estos fondos. Quiciabes paeza dura, nun-y digo que non, pero esa ye la realidá a la que nos llevó una xestión nesa Conseyería que bien podríamos dicir que ta en rebeldía a pactos de tal caláu como'l que supunxo l'alianza pola industria, a lo que se pue añedir una opacidá que nun tien xustificación con esta Cámara, polo xeneral, y con esti grupu, amás sobremanera. Precisamos información y entendemos la necesidá de la prudencia, pero eso nun puede ser escusa pa despintar datos imprescindibles".

Ante la falta d'información IX pidió al Presidente Adrián Barbón la comparecencia del conseyeru d'Industria por qu'esplique qué actuaciones se tán estudiando pa financiase col fondu de transición xusta. "Como lo dicía hai un momentu, nun se trata de ser indiscretos y ufiertar datos que puedan ser contraproducentes pa la xestión, pero lo que nun puede ser, tampoco, ye que, so la escusa de la prudencia, atentar contra una tresparencia que, nestos díes, y nestos fondos, ye especialmente necesaria", señaló Vallina.

A xuiciu d'Ángela Vallina, la busca de consensos tendría d'emponer tamién les decisiones sobro los proyectos a desenvolver, pa lo qu'en el so momentu roblóse un pactu suscritu por distintes fuerces polítiques, patronal y sindicatos: ¿para qué creamos nel so día l'alianza pola industria? Ye que nun tien esplicación, nun foi pa faer un pactu vacíu, en concencia, a lo menos esa nun yera nuesa intención, sinón pa garantizar que se tomaben les meyores decisiones sobro'l futuru de la nuesa rexón, pa llograr el máximu consensu nun asuntu que va definir, en bona midida, el futuru d'Asturies".

El mal historial de los Fondos Mineros tien que ser una alerta, según Vallina pa nun repitir erros. Nesti sentíu, la vocera d'IX preguntó al Presidente si'l destín d'estos recursos van siguir siendo decidíu por "unos pocos", si van concentrar nun solu sector, o si terminarán per emplegar se n'obres innecesaries o con procesos d'axudicación en procesos ensin tresparencia. "Aportuno, presidente, los Fondos de Transición Xusta son los herederos de los Fondos Mineros y espero, y esperamos, que nun se repitan los mesmos erros y esbarafustes. Por ello, déxeme que-y diga dende la esperiencia qu'Europa ye otra lliga, y ellí los controles de dineru público son munchos y refechos".

Por ello, Ángela Vallina pidió al Presidente que comparta esa información y que garantice un procesu tresparente de selección d'actuaciones. "Los axentes sociales, les fuerces polítiques que tamos nesta cámara, les instituciones y los conceyos tienen derechu a participar y a saber: cómo s'usa esti dineru ye una responsabilidá del Gobiernu, ensin dulda, pero tamién un derechu pa esta Cámara. Pído-y, a última hora, qu'Asturies pueda disponer y decidir sobre esos fondos porque esos fondos nin son del Gobiernu, nin son d'IX, nin son del PP: son d'Asturies"